Цените на градежните материјали се во пад, а на становите „летаат во облаци“

Министерот за транспорт, Александар Николоски денеска гостуваше во „Радио Лидер“ и зборуваше за цените на становите кои во изминатиот период „летнаа во облаци“ во главниот град на Македонија.

Николоски предупредува дека постои ризик дел од градежните проекти да не бидат завршени доколку „пукне балонот“ во градежништвото.

„Ги замолувам граѓаните да не купуваат станови без да можат да ги видат со голо око. Да не купуваат станови со т.н. прибелешка во имотен лист, туку да купат станови кои имаат добиено употребна дозвола“, кажа министерот.

Цената на одредени места во Скопје стигна и до 2.500 или 3.000 евра, а Николоски посочи дека тоа е парадоксално бидејќи цените на становите растат, а трошоците за градежни материјали во периодов се намалуваат.