На 09.11.2024 во 23.50 часот на граничниот премин „Меѓународен аеродром-Скопје“, откако му бил одбиен влез во државата, полициски службеници од Одделот за криминалистичка полиција го уапсиле Д.С.А.Д. (34) од Бразил, поради сомнение за извршување на кривично дело „неовластено производство и дистрибуција на наркотични дроги, психотропни супстанции и прекурсори“. При претресот, извршен од страна на полициски службеници од Секторот за недозволена трговија со дрога, оружје и опасни материи и Полициската станица за граничен надзор „Меѓународен аеродром-Скопје“ во координација со Царинската управа, беше употребено и службено куче од мобилен тим на Царинската управа. Во еден од куферите на Д.С.А.Д. биле откриени два килограма кокаин.
Во службениот разговор со Д.С.А.Д., тој признал дека бил ангажиран од македонски државјанин за надомест од 5000 евра за да ја транспортира дрогата од Сао Паоло до Скопје.
Врз основа на добиените информации за лицата инволвирани во транспортот на дрогата, во соработка со СВР Охрид и по наредба за претрес издадена од судија од Основен суд Охрид, биле извршени претреси кај браќата Ќ.Н. (36) и Х.Н. (28) во Охрид, по што тие се уапсени. Исто така, полициски службеници од ОВР Струга извршиле претреси на две локации кај С.К. (36), кој сè уште е во бегство и е издадена наредба за негово приведување.
СВР Скопје до Основното јавно обвинителство за гонење на организиран криминал и корупција денеска ќе поднесе кривична пријава против четирите лица инволвирани во организирањето и транспортот на два килограми кокаин.
