На 82-годишна возраст почина Јанис Бутарис, поранешниот градоначалник на Солун, кој имаше потекло од Крушево. Веста за неговата смрт ја потврди винаријата „Кир-Јани“, основана од Бутарис, каде што заедно со своите два сина ја водеше компанијата.
Бутарис беше еден од највлијателните винари во Грција. Од 2011 до 2019 година ја извршуваше функцијата градоначалник на Солун, а претходно, во периодот од 2003 до 2011 година, двапати бил и општински советник. По кратка пауза, повторно беше избран за советник минатата година и ја извршуваше таа улога до неговата смрт.
За време на својата функција како градоначалник, во 2013 година, Бутарис првпат официјално ја посети Македонија, при што откри дека има влашко потекло од Крушево. Тој беше гласен застапник за подобрување на односите меѓу Грција и Македонија и остро ги осуди протестите во Солун во 2018 година, кои се спротивставуваа на правото на Република Македонија да го користи името „Македонија“ во рамките на решавањето на спорот меѓу двете земји.
