Фото: Принтскрин
Нема потреба од нова обдукција или ексхумација на телата на починатите во трагедијата во ПУЛС, потврдуваат од Јавното обвинителство во изјава за Инфомакс, по објавената сторија од ИРЛ.
– Причината за смртта на секој од починатите е јасно утврдена, а за најголемиот дел од нив, тоа е последица на задушување од отровни гасови, велат од ОЈО за Инфомакс. Во обдукциските наоди е наведено дека станува збор за комбинација од јаглерод моноксид и други токсични гасови.
Обвинителството додава дека деталните испитувања биле неопходни од три причини: утврдување на причината за смртта, помош за лекување на преживеаните и воспоставување на каузална врска помеѓу дејствијата и последиците. Сите овие истражувања беа извршени по наредба на обвинителскиот тим, велат од Инфомакс.
Хемиските анализи, спроведени од Институтот за хемија и МВР-ОФИ, покажаа дека по пожарот во ПУЛС се испуштиле цијанидни гасови. – Вештачењата потврдија присуство на цијаниди и комбинација на други отровни гасови кои директно влијаеле на смртта на жртвите, стои во одговорот од ОЈО за Инфомакс.
Експертите кои сведочеле пред Јавното обвинителство потенцираат дека, дури и ако жртвите добиле дополнителна медицинска терапија, тоа немало да го спречи смртниот исход. Институтот за судска медицина појасни дека присуството на карбоксихемоглобин, цијаниди и термички оштетувања на дишните патишта го одредува исходот.
Од ЈО истакнуваат дека сите докази и анализи кои ја потврдуваат причината за смртта се веќе обезбедени и внимателно разгледани. – Со оглед на тоа, нема потреба од нови обдукции или ексхумации, велат од Инфомакс, цитирајќи го одговорот од Јавното обвинителство.
Обвинителството дополнително објаснува дека правната квалификација и опсегот на обвинението се базирани на сите овие докази. Обвинетите се оние кои имале обврска да обезбедат безбедни материјали во клубот, од отворањето во 2012 година до денот на пожарот, кои при согорување можеле да испуштат отровни гасови.
– Сите прашања кои се актуелни во јавноста, како што беше објавено и од Инфомакс, се веќе детално испитани и документирани, стои во завршниот одговор на ОЈО.
