Рано утрово во јужен дел на Москва, патнички автомобил експлодирал во дворот на станбена зграда, јавуваат службите за итни случаи. Возачот, кој управувал со „Киа Соренто“, успеал да помине неколку метри пред автомобилот да се запали.
Жртвата е идентификувана како генерал-потполковник Фанил Сарваров (56), кој бил извлечен од возилото во критична состојба со сериозни повреди на лицето и нозете од шрапнели. Експлозивната направа била поставена под автомобилот.
Сарваров беше началник на Дирекцијата за оперативна обука на Генералштабот на руските вооружени сили и е познат по учеството во борбените операции во Чеченија и осетиско-ингушкиот конфликт од 1992 до 2003 година, како и во воената операција во Сирија во 2015-2016 година.
Ова е веќе втор случај на автомобил-бомба во Москва оваа година. На 1 декември, „Ланд Крузер Прадо“ експлодираше во дворот на станбена зграда во Нова Москва, при што за среќа возачот, научник од истражувачки институт, остана неповреден.
Порано во текот на годината, експлозии во Москва одземоа животи на ветерани и високопоставени офицери на руските специјални сили, што ја зголемува тревогата околу безбедноста на воените и научните структури во градот.
