Фото: Левица
Обвинителството поднесе постапка против пратеникот од Левица, Саше Јанчев кој учествуваше во сообраќајка во која загина 16-годишно дете.
Јанчев се јави на социјалните мрежи во кои изрази жалење за несреќата која имаше смртни последици.
„Во сообраќајната несреќа во која бев учесник има најмалку три потресени фамилии и уште куп потресени познаници. И затоа досега молчев, оти знам што значи после еден таков настан некој постојано да те навраќа на истото.
Од тие причини нема да навлегувам во детали од настанот, но после се, чувствувам потреба нешто да кажам.
Најпрво жал ми е за се што се случи таа вечер. Не поминува ден да не помислам на ова. Веднаш после настанот пружив помош и повикав помош. Направив се што можеше да се направи.
Морам да забележам дека брза помош чекавме цели 50 минути.
Морам да забележам и дека јас сум единствен легален учесник во сообраќајот во таа несреќа.
Исто така морам да забележам и дека власта уште истиот ден, само после неколку часа, почна да го користи случајов за политичка пресметка со мене преку координирани и планирани напади.
Уште рано наутро преку нивните пропагандни медиуми пуштија вести дека сум бил пијан, дрогиран и дека сум возел бесно. Ништо од ова не е точно.
Пуштија вест дека сум возел бесен џип и ставаа слики од нови скапи возила. И ова не е точно. Моето возило е старо 20 години.
Поручекта истиот ден ДПМНЕ ме осудија од партиска прес-конференција без притоа да ги спомнат, а не пак да ги повикаат на одговорност Министерот за внатрешни и министерот за здравство.
Потоа премиерот на интервју во вести ме осуди и суптилно ми се закани со Обвинителство.
И отогаш навака постојано пробуваат медиумски да ја наметнат темава со цел да наметнат наратив дека јас некого сум прегазил. Дека јас сум некој кој вози по улица и прегазува луѓе, па дури ме нарекуваат и убиец. Да прегазиш некого е да поминеш преку некого, а тоа во случајов ни од далеку не се случи.
Пред Анкетната комисија за Кочани од пратениците на власта во собраниските ходници добивме и закана дека поради Анкетната ќе удрат по мене. Демек ако Левица ја отвора темата за Кочани они ќе удираат по мене заради сообраќајната несреќа. Чиниш сообраќајната несреќа е исто со она што се случи во Кочани.
Па потоа излезе приказната со имунитетот. Јас на имунитетот ниту сум се повикал, ниту ми паднало на памет да се повикам. Дополнително од власта убаво знаат дека имунитетот во случајов не се однесува на кривична одговорност. Пратеник може да има имунитет и пак кривично да одговара.
И сето ова се прави без осет затоа што во приказнава не сум само јас, има и настрадани и еден куп потресени.
Уште еднаш жал ми е за се што се случи и не знам зошто мораше да се случи“, објави Јанчев.
