Оваа група на лица во Скопје не треба да оди на работа – аерозагадувањето е на критично ниво

Аерозагадувањето во Скопје повторно руши рекорди, а поради тоа беа изречени препораки за тоа кои лица не треба да одат на работа.

Министерството за животна средина и просторно планирање воведе мерки за скопските населби Центар, Гази Баба, Карпош и Лисиче поради зголемено аерозагадување.

„Согласно настанатата состојба за мерните места во Скопје – Центар, Гази Баба, Карпош, Лисиче и Ректорат важат следните мерки:

• Да се интензивираат вонредните инспекциски надзори на инсталациите со А-Интегрирана еколошка дозвола

• Да се интензивираат вонредните инспекциски надзори на терен за контрола на инсталациите со Б-Интегрирани еколошки дозволи и Елаборати

• Инсталациите со континуиран мониторинг да овозможат јавен пристап на измерените податоци

• Да се интензивираат вонредните контроли на техничката исправност на возилата, особено оние со дизел горива и нерегистрирани возила

• Да се интензивираат вонредните контроли на градилиштата

• Забрана на горење на отворено

• Се препорачува на сите правни субјекти (работодавци) да ги ослободат од работни обврски бремените жени, лицата постари од 60 години, како и лицата со хронична астма, прележан миокарден инфаркт или мозочен удар, без разлика на возраста, со препорака на матичен лекар

• Се препорачува на сите правни субјекти (работодавци) да го реорганизираат работното време и лицата кои работат на отворено да работат од 11.00 до 17.00 часот

• Се препорачува да не се организираат спортски натпревари и други културни манифестации на отворено“, велат од министерството.