Фото: Принтскрин
Здружението за заштита на животните – Анима Мунди објави тажна вест преку нивниот профил на социјалните мрежи.
„Денес светот стана посиромашен за еден човек… …А ние изгубивме светлина. Викторија денес си замина.
Ненадејно.
Изненадно.
Дури сурово.
Како да се скина конецот што ја држеше врзана за сите души за кои се бореше.
Тешко е да се прифати дека човек како неа повеќе го нема.
Викторија не беше само хуманист.
Таа беше прибежиште за оние што никој не ги гледаше.
Им беше глас на немите. Рамото на исплашените. Силата на слабите.
Целиот свој живот го претвори во мисија — да даде повеќе, да спаси повеќе, да искаже љубов кога никој друг не ја давал.
Беше еден од основачите на Про Анима Берово.
Првото наше спасено животно го носеше нејзиното име – Викторија.
На почетокот стоевме заедно, со иста болка, исти рани, исти соништа.
Подоцна нашите патишта се разделија…но тоа никогаш не значеше дека се оддалечивме едни од други.
Иако мисијата не’ однесе на различни страни, секогаш бевме тука една за друга — со разбирање, со почит, со љубов.
Таа го продолжи својот пат до самиот крај — тивко, упорно, без умор.
До последниот ден, буквално до последниот здив, таа остана таму каде што најмногу требаше да биде — до животните што ги сакаше повеќе од себеси.
Понекогаш немаше ништо за себе.
Понекогаш беше уморна, истрошена, повредена.
Но за нив… за нив секогаш мораше да има.
Се грижеше за туѓиот живот повеќе отколку за својот.
Не стигнавме да се поздравиме.
Тоа е раната што најдлабоко сече.
Неизговорен збор, недадена прегратка, некажано „чувај се“.
Сега остануваат само тишината и едно големо „ЗОШТО?“.
Зошто Боже?
Зошто ги земаш добрите?
Зошто токму тие што прават светот поднослив?
Тие што носат надеж таму каде што ја нема?
Викторија,
ти благодаримешто постоеше.
Ти благодариме за секој живот што го спаси,
за секоја болка што ја пресретна,
за секој момент во кој се бореше наместо да се откажеш.
Твоите чекори може згаснаа…
Ама трагите од нив ќе останат.
Во секое животно што го допре,
во секоја душа што ја врати од работ,
во секој човек што го инспирираше да биде подобар.
Почивај во мир, голема душо.
Оние што ги спаси ќе ти светат пат.
А ние ќе те носиме со себе – секогаш“, објавија од „Анима Мунди“.
