Центарот за управување со кризи информира дека во Дојранското Езеро е спасено лице од давење, благодарение на брзата интервенција на Граничната полиција при Министерството за внатрешни работи.
Според информациите од Регионалниот ЦУК Струмица, повикот за помош пристигнал преку Единствениот повикувачки број за итни случаи 112 во 11:08 часот. Пријавено било дека лице паднало од чамец и се давело во водите на Дојранското Езеро, некаде на средината на езерото.
По итното известување на Полициската станица Гевгелија, на терен веднаш реагирале припадниците на Граничната полиција, кои го извлекле лицето на безбедно. За среќа, лицето било спасено без повреди, а полицијата го извлекла и чамецот од водата.
