Во Клиниката „Жан Митрев“ беше направена сложена хируршка корекција на ретка вродена срцева мана кај недоносено женско бебе родено во 36. гестациска недела. Новороденчето, прво од близначка бременост, дојде на свет во Приштина со тежина од едвај 2 килограми. Кај него беше откриена комплексна кардиопатија која ги опфаќа тотално аномално пулмонално венско дренирање (TAPVR) и атријален септален дефект (ASD).
Овие две состојби заедно се среќаваат многу ретко — TAPVR го има кај само 0,6 до 1,2 од 10.000 новороденчиња, а меѓу сите вродени срцеви маани овој тип учествува со 0,7 до 1,5%.
Родителите, свесни за критичноста на состојбата, ја донеле малата Озе Абази во Скопје на само две недели старост. По детална дијагностика и консултации со кардиохируршкиот тим, била донесена одлука итно да се изврши операција.
Интервенцијата, предводена од д-р Жан Митрев, вклучувала целосно пренасочување на пулмоналните вени кон левата преткомора, со што е воспоставен нормален проток на крв.
По операцијата, неонатолозите од Центарот за мајка и бебе ја презеле грижата со посебно внимание на хемодинамиката и стабилизацијата на кардиоваскуларниот систем. Постоперативниот период бил исклучително чувствителен поради нежната возраст и мала тежина на новороденчето, но со координиран тимски пристап и континуиран мониторинг, бебето успешно се опоравило.
Без хируршки третман, прогнозата кај ваков тип аномалија е многу лоша — повеќе од 80% од новороденчињата не ја доживуваат првата година. Благодарение на современите хируршки техники, шансите за преживување денес достигнуваат околу 85%.
По целосно успешната интервенција и стабилизација, малата Озе е подготвена да се врати дома, со добри прогнози за нормален раст и развој.
