Од 1 декември домаќинствата ќе плаќаат повисоки сметки за парно, во просек за околу 130 денари, соопшти претседателот на Регулаторната комисија за енергетика, Марко Бислимоски.
Цената на топлинската енергија ќе се зголеми за околу 5,9% за корисниците кои се снабдуваат преку најголемиот систем (ЕСМ Дистрибуција, ЕСМ Снабдување и ЕСМ Производство). За потрошувачите на ЕСМ Енергетика зголемувањето ќе изнесува 7,6%, додека за корисниците на Скопје Север – Енерџи Еко Линк тоа ќе биде околу 7,7%.
– Од декември, просечната сметка ќе се зголеми од 2.200 на 2.330 денари, објасни Бислимоски. Тој истакна дека потребни се долгорочни стратегии и модернизација на топловодната мрежа за намалување на дефектите, подобрување на квалитетот на снабдувањето и проширување на системот.
– Единствената причина за зголемувањето е инвестицијата во обновување на дистрибутивната мрежа, изградена уште во средината на 60-тите години, која минуваше низ повеќе сопственици, а од 2023 година ја управува една државна компанија, додаде Бислимоски.
Тој потсети дека парното греење и понатаму останува најекономично решение, а ако сите корисници кои моментално се исклучени повторно се приклучат на системот, сметките би можеле да се намалат за околу 10%.
Во моментов, околу 65.000 домаќинства се снабдуваат со топлинска енергија.
