Премиерот Христијан Мицкоски денеска од собраниската говорница откри дека во 2026 година очекува ново зголемување на платите, при што според неговите проекции, растот би се движел околу 9 до 10 проценти.
Тој појасни дека во државниот буџет веќе се предвидени средства за зголемување во секторите каде што колективните договори тоа го наложуваат – пред сè во здравството и образованието. Според Мицкоски, во наредниот период ќе следат и нови преговори со дел од синдикатите, особено во администрацијата, каде што според него одредени групи ја злоупотребуваат ситуацијата за политички поени наместо за заштита на работничките права.
Премиерот смета дека покрај растот на платите, клучно е да се зголеми и продуктивноста, која долго време имала тренд на опаѓање, но во последната година – како што рече – тој пад е запрен.
Мицкоски се осврна и на инфлацијата, нагласувајќи дека очекува намалување во последните два месеци од годинава и стабилизација меѓу 2 и 3 проценти во текот на 2026 година.
Тој посочи и дека македонската економија, во просек, создава околу 300.000 денари добивка по вработен годишно, што според него е слаб потенцијал. Мицкоски даде и хипотетички пример: доколку компаниите целата добивка ја префрлат во плати, просечната нето-плата би се искачила на околу 61.000 денари – но тоа би значело дека работодавачите целосно се откажуваат од профит, што е нереално сценарио.
– „Мораме да работиме на јакнење на економијата за бизнисите да можат да исплаќаат повисоки плати. Тоа е процес кој го почнуваме и мора да продолжи“, нагласи премиерот.
На крајот, тој повтори дека државата ќе ги испочитува сите договорени обврски со синдикатите, вклучително и оние кои се поврзани со минималната плата, и најави дека на почетокот на декември ќе се одржи седница на Економско-социјалниот совет на која овие прашања ќе бидат ставени на маса.
