Претседателот на Србија, Александар Вучиќ, вечерва се обрати од Нови Сад, каде се одржуваат протестите, и порача дека државата ќе ги преземе сите мерки за казнување на сите одговорни за насилствата.
Тој се заблагодари на припадниците на обезбедувањето на канцелариите на СНС во Нови Сад, кои останале на своите позиции додека демонстрантите се обидувале да ги нападнат.
„Полицијата вечерва се однесуваше воздржано, со почит кон жртвите на страшната трагедија која ги погоди нашите граѓани. Но, никој не треба да мисли дека насилството ќе биде дозволено. Секој што учествувал во овој акт ќе биде казнет и гонет од државата. Нема да дозволиме вакви сцени, кои потсетуваат на нацистички напади, да се повторат. Ќе ја браниме нашата држава и српската тробојка, и пристојните граѓани на Србија ќе победат,“ порача Вучиќ.
