Драматични сцени се одиграа за време на авио-презентација во Дубаи, кога индиски борбен авион „Теџас“ се урна пред десетици посетители. Снимки од несреќата веднаш се проширија на социјалните мрежи, но засега не е познато дали пилотот успеал навреме да се катапултира.
Индиските воздухопловни сили ја потврдија трагедијата и најавија дека во тек е прибирање на дополнителни информации. Во нивното кратко соопштение стои: „Авион од типот ‘Tejas’ се сруши за време на авио-настан во Дубаи. Причините се истражуваат, а подетални информации ќе следат.“
Според NDTV, падот се случил околу 14:10 часот по локално време. Од местото на несреќата се издигал густ чад, што предизвика страв и паника меѓу присутните, меѓу кои имаше и многу семејства со деца. Дали пилотот успеал да го напушти авионот пред ударот – сè уште останува непознато.
Екипите за брза интервенција веднаш се упатиле кон местото, но надлежните засега не откриваат повеќе детали.
„Теџас“ припаѓа на 4,5 генерација борбени авиони и е изграден за широк спектар мисии – од блиска борба до поддршка на копнени операции. Постојат модели за воздухопловните сили, за морнарицата, како и обучувачки варијанти со две седишта, а се смета за еден од најуспешните индиски развојни проекти, пишува Indian Express.
Верзијата што наводно се урнала, според податоците на HAL, е LCA Mk1A – најнапредната конфигурација на овој тип. Таа е опремена со AESA радар, модерни системи за електронска одбрана и предупредување, дигитални мапи, мултифункционални дисплеи и низа други технологии што значително ги унапредуваат перформансите и безбедноста на авионот.
