Фото: Дејан Митески
Градоначалникот на Општина Аеродром, Дејан Митески објави дека за секои 10 м2 новоградба на јавните површини ќе треба да се сади по едно дрво.
„Општина Аеродром го започнува новиот мандат со јасна цел – повеќе зеленило, повеќе живот, повеќе грижа за иднината.
Според новото правило: за секои 10 м² новоградба се засадува 1 нов садник на јавна површина. Така секој нов проект носи дел од природата назад во нашиот град.
Аеродром се сака со дела. Зелената офанзива е веќе во акција!
Утринава, заедно со општествено-одговорна компанија, засадивме висококвалитетни садници јавор и јасен покрај бул. „Јане Сандански“, кај игралиштето „Калистеника“. Таму каде што имаше бетон – од денес расте нов живот“, објави Митески.
