Фото: Инстаграм
Рускиот крипто-милионер Роман Новак, познат по своето бурно минато и осуда за измама во вредност од повеќе милиони долари, брутално беше убиен заедно со својата сопруга Ана во Обединетите Арапски Емирати, по неуспешен обид за изнуда.
Според извештаите, брачната двојка била намамена на лажен деловен состанок кој се претворил во смртоносна замка. Целта на киднаперите била да ја преземат контролата врз неговата значајна крипто-имотна вредност, објави порталот CryptoSlate.
Новак бил познат лик во Санкт Петербург, каде што измамил инвеститори за милионски суми преку неколку крипто-проекти. По пресудата во 2020 година, кога добил шест години затвор, тој се преселил во Дубаи и таму ја основал новата апликација за крипто-инвестиции Fintopio, со која повторно привлекол огромен број инвеститори.
Во октомври годинава, Новак и неговата сопруга тргнале на состанок со „потенцијални партнери“ во близина на градот Хата, крај границата меѓу ОАЕ и Оман. По промената на возилото и отпуштањето на возачот, двојката исчезнала без трага.
Откако неколку дена немало никаков контакт, семејството го пријавило исчезнувањето, а истрагата ја презеле руските и емиратските власти. Според првичните информации, парот бил измамен и одведен во изнајмена вила, каде киднаперите се обиделе да го натераат Новак да им даде пристап до неговите дигитални паричници со криптовалути.
Кога не успеале да дојдат до средствата, киднаперите ги убиле Роман и Ана. Телата на сопружниците, според руски извори, биле пронајдени во контејнери во близина на трговски центар во Хата. Властите потоа уапсиле седуммина осомничени, меѓу кои и неколку лица од Санкт Петербург и едно од Казахстан.
