Кандидатот за градоначалник на Скопје од партијата Левица, Амар Мециновиќ, вечерва се обрати на прес-конференција по завршувањето на вториот круг од локалните избори, изразувајќи благодарност до сите граѓани што му ја дадоа својата поддршка.
„Скопје, во овие 60.000 луѓе гледаме како изгледа нашата иднина. За само два месеца постигнавме нешто што пред тоа ни изгледаше недостижно. Граѓаните покажаа дека имаат моќ да изберат поинаку и да го насочат градот кон промени,“ рече Мециновиќ.
Тој се заблагодари и на сите волонтери и активисти кои, како што посочи, „секојдневно беа на терен, комуницираа со сограѓаните и го носеа духот на промените“.
„Овој успех не е само мој, туку резултат на нивната посветеност и труд. Секој чекор на улиците, секој разговор со граѓаните беше дел од оваа победа,“ додаде Мециновиќ.
