Познатиот македонски композитор, аранжер и музичар Кире Митрев почина на 78-годишна возраст во Минхен, како што беше објавено на неговиот официјален Фејсбук профил.
Во соопштението се наведува дека Митрев ја загубил битката во една од локалните болници во германскиот град.
Роден во Битола во музичко семејство, Кире Митрев ја започнал својата музичка кариера уште од петгодишна возраст со свирење гитара, додека формалното музичко образование го започнал на 11 години. Тој беше длабоко поврзан со македонската народна музика, свирејќи во оркестри на културно-уметнички друштва и истражувајќи ја богатата хармониска палета на македонскиот фолклор.
Главен инструмент му беше тромбонот, преку кој разви уникатен музички израз инспириран од класичната музика, особено по неговото преселување во Белград. Потоа, освен сопствената кариера, придружувал многу познати музичари на турнеи низ Југославија и Европа. На почетокот на 1980-тите, студирал на престижниот колеџ Беркли, каде што го развил својот интерес за џез музиката.
По завршувањето на студиите, основал групата „КИМ“, каде што беше композитор, аранжер, тромбонист и музички продуцент. Музичките критики го истакнуваа како визионер, а неговите композиции и аранжмани добиваа признание од медиумите.
Неговата работа ја карактеризираа слободата на изразување, импровизацијата и богатиот хармониски јазик. Во соработка со ТВ Белград и ТВ Скопје, за групата „КИМ“ беше снимена и посебна телевизиска емисија, каде како специјален гостин се појави македонскиот тромбонист Кирил Рибарски. Емисијата беше голем успех и на домашен, но и на меѓународен план.
Митрев настапувал како солист во театарот Теразије и продолжил кариера во Минхен, каде што бил член на меѓународен биг бенд, соработувајќи со светски музички ѕвезди. Од 1976 година бил прогласен за уметник од Културната заедница на Белград, а бил и солист на Биг Бендот на Радио Телевизија Белград.
Во јануари оваа година, Кире Митрев доби национална пензија од Република Србија и низ годините бил носител на бројни престижни награди и признанија.Почина македонска музичка легенда
