(ФОТО) Нина заслужува живот без болка и со насмевка – да бидеме хумани и да помогнеме

Нина Димитриевска има 14 години и боледува од церебрална парализа. Борбата на семејството трае со години.

Од нејзините две ипол години откриле дека нешто не е во ред и затоа не може да се движи. На само седум ипол години ја однеле во Америка, каде што ѝ беше извршена операција Selective Dorsal Rhizotomy (SDR) – операција што помага на децата со церебрална парализа да го намалат спазмот во нозете и да можат да чекорат.

После операцијата, со многу труд и вежби, Нина почна да оди подобро, па дури и самостојно да прави чекори.

Во меѓувреме семејството открило дека има и глауком, а подоцна и сколиоза, поради која скоро три години носи корсет. Сега состојбата веќе е сериозна и мора да се изврши операција. Стравот од последици е голем, но уште поголема е желбата Нина да има подобар живот – да може да се движи, да не трпи болки, да живее достоинствено како сите деца.