„Советниците да се откажат од паушалите за фонд за жртвите од ‘Пулс’“, предложи кандидат за советник во Кочани

Кандидатот за советник во Општина Кочани од коалицијата „Заедно за успех“, Марио Паунов, излезе со предлог сите новоизбрани советници да се откажат од своите месечни надоместоци.

Паунов смета дека тие средства треба да се насочат во солидарен фонд за поддршка на семејствата на жртвите од трагедијата во дискотеката „Пулс“.

„Многу врева и ветувања, малку конкретни дела и резултати!

Многу демагогии и празни зборови, а сепак децениски проблеми и страдања.

Во периодот на кампањата една политичка партија во неколку наврати ја злоупотреба најголемата трагедија во историјата на Кочани за политички поени. Затоа предлагам до сите избрани советници со цел да не се злоупотреба трагедија и со уште поважна цел да се помогне на настраданите семејства, да се откажеме од паушалите за советници и да основаме еден вид на солидарен фонд каде нашите паушали ќе бидат искористени за повредените деца и нивните семејства, како и за сите семејства кои ги изгубија своите најблиски.

Со реализација на оваа идеја да издвоиме мала победа во општество каде сите сме големи губитници“, напиша Паунов пред неколку дена.