Тинејџер правел „парче“ во Скопје – за 20 дена извршил четири тешки кражби

Основното јавно обвинителство во Скопје отвори истрага против 19-годишно лице, осомничено за извршување на повеќе тешки кражби, како и за одземање на моторно возило.

„За помалку од 20-тина дена, односно од 22.09 до 09.10.2025 година, осомничениот извршил четири тешки кражби на велосипеди и електрични тротинети во центарот на Скопје, со што прибавил вкупна противправна имотна корист од околу 170 илјади денари. При кражбите користел сила за да ги скрши сигурносните сајли со кои биле обезбедени превозните средства и да ги одземе.

На 28 септември осомничениот противправно одзел туѓо моторно возило –  мопед, вреден 60.000 денари со намера да го употреби за возење.

Имајќи ги предвид сите околности, јавниот обвинител до судијата на претходна постапка од Основниот кривичен суд Скопје достави предлог за определување мерка притвор за осомничениот, бидејќи тоа е единствен начин да се обезбеди неговото присуство во понатамошната кривична постапка“, соопшти Обвинителството.