Скопје, 17/10/2025 – Судот го одобри обвинението против Александар Нацев, сопственик на обезбедувачката агенција РУБИКОН, поврзано со случајот „Кочани“.
Обвинителниот акт, поднесен на 4 септември од страна на обвинителите кои ја водат истрагата за пожарот, се однесува на Нацев како реален сопственик на Друштвото за обезбедување на имот и лица РУБИКОН СЕКЈУРИТИ СОЛУШН увоз-извоз ДООЕЛ Скопје.
Судењето ќе го води судијката Биљана Смаќовска, а точниот термин сè уште не е утврден. Според обвинението, Нацев немал склучено договор за обезбедување на дискотеката „Пулс“. Обвинителството наведува дека по катастрофалниот пожар, тој давал инструкции на обезбедувачите кои биле на работа таа ноќ, од кои еден немал лиценца.
Во обвинението се посочува дека Нацев активно управувал со агенцијата и давал насоки на обезбедувачите за време на критичната вечер. Дополнително, по трагедијата, тој започнал активности за формирање ново правно лице во Струмица, со слична дејност – физичко обезбедување на имот и лица, за да продолжи со работа преку друго формално лице.
Нацев ќе се соочи со обвинение за тешки дела против општата сигурност. Според најавите, обвинението против него најверојатно ќе биде споено со големото обвинение против останатите 34 лица и три фирми, на барање на Јавното обвинителство.
Судењето за пожарот во дискотеката „Пулс“, каде што загинаа 63 млади лица, а 200 беа повредени, е закажано да започне на 19 ноември во судницата во склоп на КПУ Идризово.
