Фото: Ali Ahmeti/Facebook
Централниот штаб на Демократската унија за интеграција (ДУИ) соопшти дека сите активности на партискиот лидер Али Ахмети, планирани за утре — последниот ден од кампањата, се откажуваат.
Како што е наведено, одлуката е донесена поради потврдата дека Ахмети ќе замине во Тирана, каде ќе учествува на националниот протест во чест и поддршка на неговите соборци и основачи на Ослободителната војска на Косово (УЧК).
На денешната прес-конференција, потпретседателот на ДУИ, Арбер Адеми, изјави дека овој чекор претставува „акт на национална солидарност и потсетник дека слободата не се добива, туку се изборува со жртва“.
„Целата кампања ја водевме со достоинство и мирен тон, нудејќи реална визија за иднината, без црна пропаганда или манипулации. Нашата порака се темели на доверба, не на страв. За разлика од нас, противниците избраа поинаков пат — пат на дезинформации и поделби. Наместо идеи и програми, понудија клевети и измислици“, нагласи Адеми.
Тој додаде дека ваквиот политички дискурс покажува носталгија за времиња кога, според него, Албанците немале еднакво право на одлучување. „Тоа време е зад нас. Албанците нема повторно да бидат под туѓа команда,“ рече Адеми.
Според него, завршницата на кампањата симболизира „нов завет“ — завет на достоинство, надеж и вера во народот. „Сè повеќе граѓани, вклучувајќи и поранешни поддржувачи на ВРЕДИ, ни се приклучуваат. 19 октомври не е само датум на избори, тоа е симбол на избор за достоинство, еднаквост и напредок,“ порача тој.
„Нашата борба не завршува со кампањата – напротив, тогаш започнува. Тоа е патот на интеграција, правда и единство, пат што го избра народот и што никој не може да го запре,“ заклучи Адеми.
