Фото: Принтскрин
Фросе Левковска најави дека ќе ја исполни последната желба на својот колега и пријател Владимир Блажев – Панчо од дуото „ДНК“, со организирање хуманитарен концерт во чест на настраданите во трагедијата во Кочани и во спомен на групата „ДНК“.
„Ова нема да биде обичен настан, туку симбол на љубов, хуманост и почит кон едни големи луѓе – Андреј и Панчо, хуманитарци пред сè,“ напиша Левковска во својата објава на социјалните мрежи.
Таа потсети дека нејзината соработка со дуото започнала токму преку еден хуманитарен настан кој го организирала, а од тој момент, како што вели, врската и енергијата меѓу нив биле посебни.
Концертот нема да се одржи веднаш, бидејќи, како што истакна Фросе, моментално сите тагуваат и се сеќаваат на Андреј и Панчо со љубов и болка. Настанот ќе биде реализиран во наредниот период, кога ќе може со достоинство да се оддаде почит кон нивното дело и да се продолжи нивната хуманитарна мисија.
Левковска упати јавен повик до сите пејачи, бендови, техничка екипа и луѓе со добра волја да се приклучат и помогнат во организацијата на овој настан.
„Да го направиме ова заедно, како што би сакал тој,“ порача таа.
