Фото: Принтскрин
Македонската фудбалска репрезентација уште еднаш докажа дека знае да се носи со најсилните на европската сцена, освојувајќи вреден бод на тешкото гостување во Гент против Белгија (0-0).
Нашите фудбалери одиграа дисциплиниран и борбен натпревар, со беспрекорно поставување во дефанзивата и максимална пожртвуваност во секој дуел. Белгијците создадоа неколку добри прилики, но македонската одбрана и голманот Димитриевски беа непремостлива пречка.
По завршувањето на натпреварот, репрезентативецот Ѓоко Зајков истакна дека тимот одиграл со цело срце.
„Одигравме храбро и дисциплинирано во одбрана, се разбира дека не можеме против ваков противник секогаш да надигруваме. За мене ова е многу голем бод, игравме на гости со Белгија. Но мораме да ги спуштиме нозете на земја, имаме уште еден важен натпревар за три дена во кој мораме да освоиме три бода, ако сакаме да одиме на светско. Не, бевме само ние тројца во одбрана и Столе, тука беше средината и нападот, сите изгинавме. Кога се игра за Македонија, се остава срце на терен за на крај сè да испадне како што треба“, вели Зајков.
