Фото: Принтскрин
Пред Апелациониот суд во Скопје денеска се одржа јавна седница по повод жалбите поднесени на пресудата на Основниот кривичен суд, изречена на 13 мај годинава. Со таа одлука, Васил Јованов беше осуден на 12 години затвор поради тешки дела против безбедноста на луѓето и имотот во сообраќајот, откако претходно ја призна вината за сообраќајната несреќа на булеварот „Партизански одреди“ во јануари, во која животот го загуби Фросина Кулакова.
Обвинителството на денешната расправа побара изрекување построга казна, додека адвокатите на обвинетиот инсистираа на намалување на затворската санкција.
На седницата присуствуваше и Јованов, кој беше спроведен од Затвор Скопје, а во своето излагање повторно изрази длабоко жалење за трагичниот настан.
„Уште еднаш сакам да изразам најдлабоко каење и искрено сочувство на семејството на загинатата. Голема грижа на совест имам за тоа што се случи“, кажа Јованов.
