Фото: Принтскрин
Македонската тенисерка Лина Ѓорческа запиша една од најголемите победи во својата кариера, откако на отворањето на турнирот во Самсун (Турција) успеа да ја елиминира поранешната светска број еден, Каролина Плишкова.
Првиот сет донесе возбудлив финиш – Ѓорческа направи два последователни брејка и освои четири гема по ред, со што обезбеди водство. Одличната игра ја продолжи и во вториот сет, каде што доби четири од првите пет гема и ја стекна предноста што рутински ја одржа до крај.
Чешката тенисерка Плишкова, која во јули 2017 година беше лидер на ВТА-листата, зад себе има 17 освоени титули и заработка од 26 милиони долари, што уште повеќе ја потенцира важноста на победата на Ѓорческа.
Во второто коло, најдобрата македонска тенисерка ќе се соочи со осмата носителка на турнирот, Романката Софија Костулас. Турнирот во Самсун е со награден фонд од 115.000 долари.
