(Фото) Познато што се случило со Турчинот кој почина – бил донесен со возило и оставен пред Клиника

Секторот за внатрешни работи – Скопје го расветли случајот со турскиот државјанин М.А.О. (61), кој на 23 септември 2025 година беше донесен во Комплексот клиники „Мајка Тереза“ со тешки телесни повреди, по што почина.

Според истрагата, мажот бил донесен во болница со приватно возило, чиј возач веднаш ја напуштил клиниката. По преземените мерки на Единицата за насилен криминал, пронајден е автомобилот „Хонда Сивик“ и идентификувано е лицето Х.М., кое го превезло повредениот.

Обдукцијата извршена во Институтот за судска медицина утврдила дека турскиот државјанин починал како последица од пад од висина, додека извршувал работни задачи на градилиште во скопската населба Стопански двор.

За трагичниот настан биле известени Државниот инспекторат за труд и надлежниот јавен обвинител.