Фото: Принтскрин
Претседателот на САД, Доналд Трамп, со нова објава на својата социјална мрежа изненади со поинаков став за војната во Украина. Тој порача дека земјата, со поддршка од Европа и НАТО, има капацитет да ги врати сите територии изгубени од почетокот на руската инвазија.
Оваа изјава претставува целосен пресврт во реториката на Трамп, кој во минатото беше скептичен за можностите на Украина и често го критикуваше нејзиното раководство предводено од претседателот Володимир Зеленски, додека кон рускиот претседател Владимир Путин покажуваше поголема наклонетост.
„Откако ја согледав воената и економската состојба на Украина и Русија, и економските проблеми што ги предизвикува овој конфликт за Москва, сметам дека Украина е во позиција да се бори и да ја врати својата целосна територија. Со време, трпение и финансиска поддршка од ЕУ и особено од НАТО, обновувањето на границите од почетокот на војната е целосно остварлива опција. Зошто да не? Русија веќе три и пол години води бесмислена војна што вистинска воена сила би ја завршила за помалку од една недела. Тоа не е комплимент за Русија, туку покажува дека изгледа како ‘тигар од хартија’“, истакна Трамп.
Тој додаде дека руската економија е сериозно погодена и дека граѓаните се соочуваат со тешкотии, меѓу кои и редици за гориво и недостиг од основни ресурси, бидејќи најголемиот дел од средствата се насочени кон финансирање на војната. Според него, Украина покажува силен дух и напредува, што дополнително ја зголемува нејзината шанса за успех.
„Путин и Русија се во големи економски проблеми и сега е моментот Украина да делува. Ѝ посакувам добро и на Русија и на Украина. Ние ќе продолжиме да го снабдуваме НАТО со оружје, а понатаму тие нека одлучат како ќе го користат. Среќно на сите!“, напиша Трамп во својата порака.
