Фото: Принтскрин
Американскиот претседател Доналд Трамп се обрати на 80. заседање на Генералното собрание на Обединетите нации во Њујорк со говор што траеше речиси четири пати подолго од предвиденото. Настапот беше во препознатливиот стил на Трамп – исполнет со лични пораки, остри критики и директни обвинувања.
Голем дел од својот говор тој го посвети на војната во Украина и односот на Европа кон Русија. Трамп остро ги нападна европските влади, вклучително и членките на НАТО, поради тоа што не го прекинале увозот на руска енергија.
„Финансирате војна против самите себе. Купувате нафта и гас од Русија додека ја поддржувате Украина – тоа е срамота“, изјави тој.
Трамп најави дека САД се подготвени да воведат нова рунда царини против Русија доколку не се постигне договор за прекин на војната. Сепак, додаде дека ваквите мерки ќе имаат вистински ефект само ако и европските држави се приклучат и ги применат во идентичен облик.
