Фото: Принтскрин
Германските вооружени сили изработуваат планови за згрижување и лекување на до 1.000 ранети војници дневно во случај на избивање на голем вооружен судир меѓу НАТО и Русија, јавува Reuters. Овие подготовки доаѓаат во време кога алијансата предупредува дека Москва би можела да биде способна за напад уште од 2029 година.
Иако Русија ги отфрла тврдењата дека се подготвува за војна со западниот воен сојуз, неодамнешните упади на руски авиони и дронови на територијата на НАТО предизвикаа дополнителна загриженост и страв од ескалација на конфликтот.
Главниот германски воен хирург Ралф Хофман појасни дека бројот на ранети би зависел од интензитетот на борбите и од бројот на ангажираните единици. „Реално, зборуваме за бројка од околу 1.000 ранети војници дневно“, изјави Хофман во интервју за Reuters.
По руската инвазија врз Украина во 2022 година – најголемиот вооружен судир во Европа по Втората светска војна – европските армии, вклучувајќи ги и нивните медицински служби, ги засилија подготовките за можен воен судир со Москва. Во тој контекст, Германија постојано ја прилагодува својата медицинска обука, црпејќи искуства од војната во Украина.
