Фото: Принтскрин
Американскиот генерал Кит Келог, специјален соработник на претседателот Доналд Трамп за Украина, предупреди дека евентуална руска победа во Украина би можела да го охрабри Владимир Путин да започне напад врз некоја од членките на НАТО. Во интервју за „Телеграф“, Келог направи паралела со настаните пред Втората светска војна.
Тој се надоврза и на изјавата на поранешниот потпретседател на САД, Мајк Пенс, кој минатата недела изрази стравувања дека доколку Москва ја освои Украина, следен чекор би бил напад врз НАТО.
„Апсолутно. Путин и Русија треба да се гледаат како експанзионистичка сила. Тој има цел да го обнови Руското царство – историјата тоа го покажува. Дадете му инч, ќе земе милја“, изјави Келог.
Генералот потсети на 1938 година кога Хитлер во Минхен тврдеше дека сака само дел од Судетската област. „Потоа го зеде Порајне, Полска, и на крајот светот влезе во Втората светска војна. Историјата не се повторува буквално, но сигурно се ’римува’. Токму тоа денес се случува со Украина. Мораме веднаш да го запреме Путин“, нагласи тој.
Келог оцени и дека рускиот лидер „никогаш не престанал да биде агент на КГБ“. „Тој не го разбира Западот. Се преправа дека не зборува англиски, но всушност го зборува и неколку пати сме го фатиле во тоа. Тој е манипулатор, а единствено што може да му се спротивстави е силата“, додаде генералот.
