Фото: Gladiator Vesti
Жителите на скопската населба Аеродром и денеска излегоа на улица, продолжувајќи го бунтот против енормното загадување кое, според нив, доаѓа од дивата депонија „Вардариште“ и од пожарот што деновиве беснее на депонијата „Дрисла“.
Ова е веќе петти ден по ред како граѓаните протестираат, а денешниот собир беше најмасовен досега, со присуство на неколку стотици жители. Со транспаренти во раце и скандирања, тие испратија јасна порака дека повеќе не можат да живеат во услови на задушлив чад и неподнослива миризба што се шири низ градот.
„Дрисла не труе! Секојдневно дишеме отрови, а институциите молчат. Ало, не се дише“, беа само дел од пораките кои ги испратија граѓаните и преку социјалните мрежи затоа што и вечерва има поплаки дека градот е зачаден.
Во текот на денот беше активиран и „ер-трактор“ кој го гаснеше пожарот со специјална пена.
