Фото: Принтскрин
Поранешниот премиер на Република Македонија, Никола Груевски испрати порака преку социјалните мрежи и ја честита независноста на државата.
„Поминаа 34 години од референдумот за независност организиран на 8 септември 1991 година.
Постои разлика помеѓу независноста како формулација во уставот и реалната независност на државите, особено помалите.
Таа независност делумно зависи од поголемите и особено од големите држави во светот и сојузите каде свесно се отстапува дел од сувереноста на државата заради повисока цел.
Но уште повеќе таа независност зависи од волјата на народот во земјата за самостојно, суверено и независно одлучување за својата иднина и развој.
Постојат народи и држави, вклучително и мали, кои силно и грчевито се борат да си обезбедат колку што е можно поголема реална сувереност и независно носење на одлуките за сопствената иднина и развој.
Постојат и такви народи и држави, кои не само што се подготвени на премногу големи компромиси, туку и оставаат впечаток како да сакаат некој друг да одлучува за нив, па иако најчесто тоа никој не го очекува од нив, тие едвај чекаат, а често и бараат од преставниците на други држави на некој начин тие да одлучуваат наместо нив, што секако тие ќе го прифатат бидејќи е во нивна корист.
Да не бидеме како вторите. Да бидеме како првите!
Да ја превземавме одговорноста за иднината и развојот на Македонија, за одлуките за надминување на проблемите и предизвиците, самостојно и суверено да одлучуваме секогаш кога тоа е можно.
Да бидеме вистински независни.
Така и повеќе ќе не почитуваат сите други, колку и понекогаш да не им се допаѓа нашиот став и нашите одлуки.
Нека е честит празникот на независноста и нека е секогаш повод да се потсетиме и да ги афирмираме луѓето и хероите кои се вложиле, ризикувале, а дел од нив се жртвувале на патот за обезбедување на државноста и независноста.
Тие го заслужуваат тоа!
Нека е вечна Македонија!
Нека е вечна независноста“, напиша поранешниот премиер.
