Фото: Принтскрин
Министерот за внатрешни работи, Панче Тошковски, во интервју за МИА истакна дека безбедноста во сообраќајот останува еден од најсериозните предизвици со кои се соочува државата. Тој потсети дека само минатата година во Македонија животот го загубиле 142 лица во сообраќајни несреќи, бројка што, според него, е целосно недозволива за една современа држава.
Во разговорот, Тошковски се осврна и на проектот „Безбеден град“, кој треба да стартува на 1 јануари следната година, а чија цел е преку модерни системи за надзор да се намали бројот на жртви и сообраќајни прекршоци.
Министерот притоа укажа и на нов проблем што сè повеќе се појавува во урбани средини – несоодветното управување со електрични тротинети. Тој раскажа лична случка пред интервјуто, кога речиси бил удрен од двајца малолетници кои заедно управувале еден тротинет.
„Прво, тоа не е дозволено ниту според актуелната регулатива. Второ, ниту едниот, ниту другиот имаа заштитна кацига или било каква ознака. Тоа е показател дека сегашните правила за користење на тротинетите, за жал, не даваат очекувани резултати“, нагласи Тошковски.
