Филипче: Знам дека граѓаните се против Бугари во Устав, но тоа од нас го бара ЕУ

Претседателот на СДСМ, Венко Филипче, најави дека до крајот на неделата партијата ќе ја претстави својата Резолуција со јасно дефинирани „црвени линии“ во однос на францускиот предлог и отворањето на преговорите за членство во Европската Унија.

Тој истакна дека целосно ги разбира граѓаните кои на изборите изразија противење кон внесувањето на бугарската заедница во Уставот, но потсети дека тоа претставува услов кој доаѓа директно од европските институции. Според него, игнорирањето на ова прашање и останувањето во статус кво би било најлошата можна опција за државата.

Филипче нагласи дека досегашните документи и договори во процесот на преговори со Брисел не го довеле во прашање македонскиот идентитет, ниту пак ги загрозиле националните интереси.

„Ја разбирам грижата на граѓаните, а тоа меѓу другото тие на некој начин и го изразија за време на минатогодишните избори, кога во тој контекст така гласаа, кога станува збор за СДСМ наспроти ВМРО-ДПМНЕ и сметам дека таа грижа на граѓаните не треба да ја ставиме по страна. Тоа што од нас го бара Европската Унија, не го бара само Бугарија, тој документ на Европската Унија на Брисел, практично е нешто што е резултат на бројни преговори на еден долготраен процес“, кажа Филипче.