Фото: Принтскрин
Швајцарија е подготвена да му обезбеди имунитет на рускиот претседател Владимир Путин, и покрај тоа што против него е поднесено обвинение во Меѓународниот кривичен суд, доколку одлучи да учествува на мировна конференција. Ова го соопшти швајцарскиот министер за надворешни работи Игнацио Касис.
Касис потсети дека уште минатата година федералната влада усвоила правила според кои е можно лице под меѓународна потерница да добие имунитет, но само ако причината за неговото присуство е учество на мировен форум, а не приватна или лична посета. Оваа одлука, како што рече, има цел да овозможи непречено одржување на иницијативи кои се во интерес на глобалниот мир.
На заедничката прес-конференција со италијанскиот министер за надворешни работи Антонио Тајани во Берн, Касис нагласи дека Швајцарија, како традиционално неутрална земја, сака да биде домаќин на дијалог меѓу завојуваните страни.
Истовремено, претседателот на Франција, Емануел Макрон, порано во текот на денот ја посочи Женева како потенцијално место за идна средба помеѓу Путин и украинскиот претседател Володимир Зеленски, што дополнително ја зајакнува улогата на Швајцарија како можно дипломатско средиште.
