Пет месеци по трагичниот настан во дискотеката „Пулс“ во Кочани, родителите на загинатите млади сè уште живеат со болката и горчината. Во разговор со нашата редакција, тие отворено зборуваа за своето искуство и разочараноста од институциите.
Со треперливи гласови и солзи во очите, родителите раскажаа низ што поминуваат, особено по средбата со премиерот Христијан Мицкоски. „Очекувавме состанок исполнет со разбирање и емпатија, но тоа беше единствениот пат кога го видовме. Наместо човечка блискост, добивме разочарување,“ вели една мајка.
Таа додава дека на влезот во кабинетот биле пристојно пречекани од службениците, но впечатокот што го оставил премиерот бил поинаков: „Со дел од нас едвај се поздрави, а некои ги тапна само по рамото, без зборови.“
Родителите потсетуваат дека претходно доставиле официјално барање до Кабинетот на премиерот, како и до претседателката и претседателот на Собранието. Иако писмото било заведено на 3 јули, премиерот тврдеше дека првпат го гледа. „Рече дека не морал да го види за да знае што пишува, и покрај тоа што дописот беше јавно објавен,“ раскажува една од мајките.
Дополнителен шок предизвикала реакцијата на неговата потпаролка, која наместо да го проследи писмото до адресатот, го препратила во други институции. Кога конечно премиерот ги погледнал барањата, одбил да го прочита целиот документ. „Не, не, ќе ви го скратам времето, вие сигурно брзате за на гробишта,“ бил неговиот одговор.
Особено болно им звучеле неговите зборови за првата точка – еднократна парична помош. „Не праша дали и ние како СДСМ бараме пари, само уште цената да си ја кажеме за нашите деца,“ велат родителите.
Тие го потсетиле дека никогаш не дошол во Кочани да запали свеќа или да изрази поддршка, на што премиерот возвратил дека вината не била негова.
Извор: Инфомакс
