Фондацијата „д-р Верица Механџиска“ и компанијата Зегин обезбедија апарат TMS M50 Ultimate, наменет за поддршка на лицата со нарушување од аутистичниот спектар. Уредот помага во подобрување на социјалната интеракција, комуникациските вештини, регулирање на сензорната хиперактивност и развој на когнитивната флексибилност. Донацијата е наменета за ЈЗУ Центарот за рехабилитација на патологијата на вербалната комуникација и претставува значаен напредок во третманот и намалувањето на предизвиците поврзани со аутизмот.
Директорката Нермин Теловска нагласи дека апаратот нуди и напреден софтвер кој овозможува собирање податоци за истражувања и креирање на протоколи базирани на факти, што дополнително ја зголемува неговата вредност.
Оваа донација е резултат на хуманитарната трка „Зегин Спектратон – Трка на херои во сите бои“, каде граѓаните преку спортски активности поддржуваат инклузивни проекти за заедницата. Покрај апаратот TMS M50 Ultimate, средствата од трката ќе се искористат и за: опремување на сензорна соба во Здружението Рубико во Кочани, реновирање на одделот за психофизиологија при Клиниката за детски болести и спроведување на бесплатна програма за рана проценка на нарушување од аутистичниот спектар преку Здружението Сина светулка.
Овие активности покажуваат дека со заеднички напори на граѓаните и компаниите може да се создадат значајни промени и позитивни примери за целата заедница.
