Според најновите податоци на Агенцијата за вработување на РСМ, на крајот од јуни 2025 година во државата биле регистрирани 97.157 невработени лица, што е зголемување од 2.786 лица во однос на мај (94.371). Исто така, бројот на невработени е поголем и во споредба со истиот месец лани, кога биле 96.828 лица.
На регионално ниво, најмногу невработени има во Град Скопје – 21.118 лица, што е зголемување за 1.292 лица од јануари. Следува Тетово со 12.409 невработени, Куманово со 9.623 (мал пад), Гостивар со 7.388 и Прилеп со 5.464 лица.
Владата, сепак, очекува годинава стапката на невработеност да се намали на 11,1%, додека стапката на вработеност да достигне 47%, според ребалансот на Буџетот за 2025 година.
Разликата во податоците помеѓу Агенцијата за вработување и Заводот за статистика произлегува од различната методологија на мерење: Агенцијата евидентира реален број на активни баратели на работа, додека Заводот ја мери стапката на вработеност и невработеност на ниво на целата држава.
