Фото: Принтскрин
Скопјанец на возраст од 55 години е приведен под сомнение дека ја загрозил безбедноста на полициски хеликоптер кој учествувал во акција за гаснење пожари низ државата.
Инцидентот се случил на 12 август 2025 година околу 18:55 часот, кога екипа од Полициската станица Карпош го лишила од слобода лицето И.А. од Скопје. Според информациите од МВР, тој се сомничи за кривично дело „загрозување на безбедноста на воздушниот сообраќај“ предвидено во член 303 од Кривичниот законик.
„Имено, на 06.07.2025 околу 18 часот, додека полицискиот хеликоптер приоѓал кон местото каде реката Лепенец се влива во реката Вардар со цел да наполни вода за гасење на пожарот во реонот на Блаце, пилотите забележале лице кое влегло во плиткиот дел на коритото на Вардар и мавтало со рацете, по што од лица кои биле присутни на местото на настанот биле известени дека лицето фрлало со камења кон воздухопловот Белл 412 и поради тоа биле принудени да го променат местото на полнење на вода, затоа што биле ставени во крајно безбедносно загрозување и тоа додека извршувале задачи за потребите на државата и граѓаните. По преземени мерки и активности, И.А. е пронајден и лишен од слобода и по документирање на настанот против него ќе биде поднесена соодветна кривична пријава“, соопшти МВР.
