Фото: Александар Стојкоски
Денес, во општина Ѓорче Петров, со свеченост беше одбележана 24-годишнината од загинувањето на група македонски бранители – Томе Димоски, Ивица Златевски, Раде Јанковски, Томислав Настевски, Ацо Ангеловски, Томе Бадаровски, Гоце Чанкуловски, Бранко Јанев и Марјанчо Бошковски. Овие храбри војници го положија својот живот на 10 август 2001 година, во месноста Љуботенски Бачила, кога се бореа за одбрана на татковината.
По тој повод, градоначалникот на општината, Александар Стојкоски, заедно со други претставници од локалната власт, положи свежо цвеќе на неколку значајни споменици кои ја одбележуваат нивната храброст и жртва. Меѓу нив беа споменикот на херојот Томислав Настевски во Ѓорче Петров, Споменикот на бранителите во реонскиот парк, како и Споменикот на македонските јунаци во Волково.
„Денес се навршуваат 24 години од херојската жртва на Томе Димоски, Ивица Златевски, Раде Јанковски, Томислав Настески, Ацо Ангеловски, Томе Бадаровски, Гоце Чанкуловски, Бранко Јанев и Марјанчо Бошковски, храбрите македонски бранители кои ги положија животите за татковината.
Тие не се само имиња – тие се нашата колективна совест, нашиот завет и нашиот обврзувачки спомен.
Нивната храброст ја искова слободата што денес ја живееме. Нашата должност е да паметиме, да раскажуваме и да ја пренесуваме нивната жртва на идните генерации.
Во нивна чест, денес, на денот на нивното загинување кај месноста Љуботенски Бачила, положивме свежо цвеќе на споменикот на херојот Томислав Настевски во Ѓорче Петров, на Споменикот на бранителите во реонскиот парк, и на Споменикот на македонските јунаци во Волково.
Вечна им слава и благодарност.
Да не заборавиме. Нивната жртва е нашето знаме, нивниот подвиг, наша обврска! Со челична решеност ја бранеа секоја педа од татковината.
Слава им и вечна благодарност“, напиша Стојкоски.
