Фото: Принтскрин
Иако 2 август се слави како Илинден – денот кога избувнало историското Илинденско востание, православните верници денес го одбележуваат празникот посветен на Свети Илија, меѓу народот познат и како Илија Громовник. Овој празник има длабоки корени во народната традиција и е поврзан со бројни верувања и обичаи кои и денес се почитуваат, особено во руралните средини.
Свети Илија се смета за еден од најсилните светци во христијанството, заштитник на небото, грмотевиците и дождовите. Се верува дека тој со огнена кочија се вози низ небото и со својата сила одредува кога ќе има дожд или суша. Поради тоа, луѓето со стравопочит му се обраќаат, верувајќи дека може да го благослови родот или да донесе несреќа ако се навреди.
Во народната традиција, денот на Свети Илија се смета за пресвртница – се вели дека по него жештините полека почнуваат да стивнуваат, а сонцето станува помилостиво. Старите велат дека токму на овој ден е најдобро да се јаде мед, бидејќи се верува дека носи здравје и сила за целата година. Во минатото, мајките ги мачкале своите деца со мед за да бидат здрави, силни и весели.
Се верува и дека на денот на Свети Илија не треба да се работи на поле, бидејќи тоа може да го налути светецот и да донесе невреме, град или суша. Овој обичај сè уште се почитува во многу села, каде што денот поминува во молитва, празнична трпеза и одбегнување на тешка работа.
