Уапсени две лица од Косово: Оштетиле две патарини, удриле во друго возило и излетале од пат

На 31 јули 2025 година, околу 22:30 часот, полициски службеници лишиле од слобода две лица од Косово – Г.Л. (24) и Б.Л. (18), поради сомнение за шверц на мигранти. Во возилото „Фолксваген Кеди“ со косовски регистарски ознаки, кое го управувал Г.Л., биле пронајдени осум државјани на Народна Република Кина, кои нелегално се превезувале кон внатрешноста на земјата.

Инцидентот започнал околу 21:40 часот, кога возилото било забележано како се движи на автопатот Градско–Скопје и не застанало на јасно даден полициски знак за запирање. Наместо тоа, возачот започнал дивјачко бегство, при што предизвикал серија инциденти и материјални штети.

Додека се обидувал да им избега на полициските патроли, возачот ја оштетил рампата на наплатната станица кај Градско, а потоа во Катланово удрил во патничко возило „Опел Инсигниа“ со странски регистарски ознаки, како и во мотоцикл со македонски таблички. Бегството продолжило и на наплатната станица Петровец, каде што повторно била оштетена рампа, а возачот продолжил кон скопската обиколница.

Кај клучката Приштина, возилото излетало од патот, по што осомничениот Г.Л. се обидел физички да се пресмета со полициски службеник во обид да избега, но веднаш бил совладан и приведен. За време на акцијата, полициските службеници биле принудени да употребат предупредувачки истрели, при што, среќно, нема повредени лица.