Израелската војска изврши напади врз воени цели во Иран, одговарајќи на неодамнешните масовни ракетни напади од Техеран. Овие операции се сметаат за дел од Израелското право и должност да реагира на заканите од Иран и неговите посредници.
Портпаролот на Израелските одбранбени сили, Даниел Хагари, изјави: “Сега можам да потврдам дека го заклучивме израелскиот одговор на нападите на Иран. Направивме насочени и прецизни напади врз воени цели во Иран, спречувајќи непосредни закани за државата Израел.” Тој додаде дека, ако Иран направи грешка и започне нова рунда на ескалации, Израел ќе биде обврзан да одговори, нагласувајќи дека сите оние кои се закануваат на Израел ќе платат висока цена.
Според информации од Си Ен Ен, израелскиот напад започнал во 2:30 часот утрово и траел околу четири часа. Израелските авиони успешно се вратиле назад по завршувањето на операцијата.
Иранската команда за противвоздушна одбрана објави дека нападите биле успешно пресретнати, при што истакнаа дека нападите предизвикале „одредена штета“. Двајца ирански војници загинале во нападите, а портпаролката на иранската влада, Фатемех Мохаџерани, ја поздрави акцијата на воздушната одбрана, сметајќи ја за важен момент на национална гордост.
САД изразија посветеност за одбрана на Израел и ги предупредија властите во Техеран од можни последици по нивните дејства. Секретарот за одбрана на САД, Лојд Остин, во телефонски разговор со израелскиот колега, ја потврдил поддршката на САД за правото на Израел да се брани.
Овој конфликт е дел од поострата ескалација на тензиите во регионот, откако Иран на први октомври истрела околу 200 балистички ракети кон Израел, како одговор на израелските воени интервенции во појасот Газа и во Либан.
