Фото: Gladiator Vesti
19 јули – Денеска православните верници го прославуваат споменот на Свети Сисој Велики, еден од најпознатите пустиножители од раната христијанска ера, чие име векови подоцна продолжува да носи длабока духовна порака – дури и за големите, дури и за бесмртните.
Според преданието, Свети Сисој, живејќи во длабока самотија во египетската пустина, наишол на гробот на славниот Александар Македонски. Во мигот кога го погледнал тленото тело на некогашниот светски освојувач, старецот ја изговорил реченицата што и денес се памети во монашките кругови:
„О, Александар, колку моќен беше, а сега – само прав и пепел.“
Во духот на таа порака, денеска во храмот „Св. Петка“ во Скопје, еден верник донесе леб како симболичен дар, со молитва за здравје, мир и благослов за сите Македонци ширум светот. Чинот беше едноставен, но исполнет со значење – токму како животот на Сисој, кој повеќе зборувал со тишината на своите подвизи отколку со гласни проповеди.
Сисој е родум од Мисир (денешен Египет) и бил ученик на Св. Антониј Велики. Шеесет години го минал во пустината, каде се сметал за жив извор на духовна мудрост. Велат дека исцелувал болни, изгонував демони, па дури и воскреснувал мртви. Пред смртта неговото лице заблескало како сонце, а кога ја испуштил душата, просторијата се исполнила со прекрасно благоухание. Се упокоил во 429 година, но неговиот подвиг продолжува да сведочи – и за животот, и за смртта, и за тоа што навистина е вечно.
Денешниот ден, со споменот на Сисој и сенката на Александар, не потсетува дека силата не е во мечот, туку во смирението. И дека, иако сите сме прашина, преку верата можеме да станеме светлина.
