Фото: Принтскрин
Бројот на загинати во нападот во црквата во Дамаск се искачи на 20 лица, додека 52 се повредени, соопшти сириското Министерство за здравство.
Претходно, Министерството за внатрешни работи информираше дека во нападот загинале 13 цивили, а 53 биле повредени.
Сириската опсерваторија за човекови права со седиште во Велика Британија објави дека во терористичкиот напад загинале 22 лица, а десетици се повредени. Од организацијата посочуваат дека се очекува бројот на жртви дополнително да се зголеми.
Сириските медиуми јавуваат дека безбедносните сили воспоставиле заштитен кордон околу местото на експлозијата, додека спасувачките екипи продолжуваат со пребарување, евакуација на повредените и нивно транспортирање во најблиските болници.
Според извештаите, напаѓачот влегол во црквата за време на богослужба со експлозив, при што прво отворил оган кон верниците, а потоа се разнел.
Грција остро го осуди нападот
Грчкото Министерство за надворешни работи остро го осуди нападот, барајќи од преодната влада на Сирија да преземе итни мерки за заштита на верниците.
„Најостро го осудуваме ужасниот терористички самоубиствен напад во црквата во Дамаск, Сирија. Верските објекти никогаш не смеат да бидат цел на тероризам“, се вели во соопштението на Атина, што го пренесе весникот „Катимерини“.
Франција, исто така, испрати остра осуда
Министерството за надворешни работи на Франција денеска го осуди нападот врз црквата во главниот град на Сирија.
Во соопштението по нападот, француското министерство изрази „целосна солидарност со Сиријците, кои се надеваат дека нивната земја конечно ќе го најде патот до мирот“, пренесе агенцијата „Ројтерс“.
Видеото може да се погледне ТУКА.
