„Секој граѓанин над 40 години ќе има право на бесплатен здравствен преглед“, вели новиот министер за здравство

Сите лица постари од 40 години наскоро ќе добијат можност за бесплатни превентивни здравствени прегледи, со цел навремено откривање на дијабетес, високиот крвен притисок, срцеви и белодробни заболувања. Ова го најави новоименуваниот министер за здравство, Азир Алиу.

Како што истакна министерот, оваа иницијатива е дел од заложбите за приближување кон европските здравствени стандарди и претставува значаен чекор кон унапредување на јавното здравје.

Превентивните прегледи ќе бидат достапни за сите граѓани кои ги исполнуваат критериумите, без разлика на нивниот социјален статус или место на живеење.

„Европските стандарди покажуваат дека од 35 до 45 проценти се намалуваат ризиците за понатаму и лекувањето е многу поевтино. Направена е физибилити-студија, знаеме како – ќе одиме чекор по чекор со кампања за да ги информираме граѓаните и втор момент е начинот на апликација. Ова е програма за скенирање и обуки за тоа како да се грижиме за нашето здравје“, кажа Алиу.