Во знак на револт против насилството врз жените и сè почестите случаи на фемицид, утре во Скопје ќе се одржи протестен марш на кој ќе се побара правда за 17-годишната Билјана Кириќ од Богданци.
Зад протестот стои неформалната иницијатива „Ниту една повеќе!“, од каде повикуваат на масовно присуство и заедничко кревање глас против родово базираното насилство и институционалното непостапување.
Собирот е предвиден за 12 часот во паркот „Жена Борец“, по што демонстрантите ќе продолжат кон институциите од кои се очекува конкретна одговорност и дејствување.
Меѓу главните барања на организаторите се целосно расветлување на случајот, транспарентна истрага и утврдување на евентуалните пропусти во постапувањето на надлежните служби. Дополнително, се инсистира на поефикасен систем за заштита на жените и девојките кои се изложени на семејно и родово базирано насилство.
Протестната поворка ќе помине пред Собранието и Министерството за правда, а последната станица ќе биде Министерството за образование и наука.
Пораката на маршот е јасна: насилството не смее да се игнорира, а заштитата на жените не смее да остане само на декларативни заложби.
Веста ја пренесува 24chasa.mk
