Никола Мартан (31) од Гола, во Копривничко-крижевачката жупанија во Хрватска, почина по речиси три месеци борба за живот, откако на почетокот на јули беше брутално претепан во Медулин.
Никола во Истра заминал со својата мајка за време на летната сезона, каде што работел како келнер. Кобната ноќ, по завршувањето на смената, излегол на пијалак со двајца колеги, државјани на Србија.
Нападот се случил на 5 јули околу 3:40 часот наутро, пред угостителски објект на улицата Осиповица во Медулин. По кратка вербална расправија, 19-годишен млад човек го удрил Никола со тупаница во главата. Од силниот удар тој паднал и со главата силно удрил во работ од тротоарот.
Но, нападот продолжил. Тројцата напаѓачи ги нападнале и неговите двајца колеги. Еден 33-годишен државјанин на Србија бил соборен, а двајца од осомничените продолжиле да го удираат и додека лежел на земја. Другиот, 24-годишен колега, исто така бил соборен, по што тројцата го удирале со тупаници и клоци по телото и главата.
Двајцата колеги поминале со полесни повреди, додека Никола се здобил со тешки повреди на главата и веднаш бил ставен во индуцирана кома.
Никола во кома поминал околу два месеца. Неговите блиски раскажувале дека лекарите се обидувале постепено да го разбудат, но тој долго време не реагирал.
Потоа дошол момент кој на семејството му дал огромна надеж – Никола се разбудил.
Не можел да зборува ниту да оди, но почнал да покажува знаци дека ја чувствува околината. Ја движел десната рака, а во еден момент дури ѝ се насмевнал на мајка му.
Семејството и пријателите верувале дека најтешкото е поминато и дека Никола ќе продолжи да се опоравува.
Сепак, следел нов, трагичен пресврт. По излегувањето од болница му била потребна целодневна нега, па мајка му му обезбедила сместување додека да заврши со сезонската работа. Но, Никола набргу добил тешка воспалителна инфекција на белите дробови и повторно бил хоспитализиран.
Неговата состојба нагло се влошила и на 1 октомври починал во болницата во Пула. Полицијата за неговата смрт го известила надлежното државно обвинителство, а телото било испратено на обдукција.
Само неколку дена пред неговата смрт, на 25 септември, Општинското државно обвинителство во Пула соопштило дека против тројцата осомничени – двајца 19-годишници и еден 18-годишник – е поднесено обвинение.
Првообвинетиот се товарел за особено тешка телесна повреда и непружање помош, додека сите тројца биле обвинети и за обид за нанесување тешки телесни повреди. На второобвинетиот и третообвинетиот им се става на товар и непружање помош на повредениот Никола.
Според обвинителството, откако првообвинетиот го удрил Никола и тој паднал со тешки повреди, никој од обвинетите не му помогнал, туку продолжиле да ги напаѓаат неговите колеги.
Судот го прифатил барањето на обвинителството тројцата да останат во притвор поради опасност од повторување на кривичното дело.
По смртта на Никола, полицијата го известила обвинителството, кое сега треба да ја промени правната квалификација на делото против првообвинетиот во потежок облик.
Никола уште како дете останал без татко. Втора година по ред тој и неговата мајка заминувале во Истра на сезонска работа.
Зад него остана 13-годишниот син, а неговото семејство и пријатели по неговата смрт останаа со споменот на долгата борба во која, и покрај краткиот момент на надеж, Никола сепак не успеа да ја добие најважната битка.
Веста ја пренесува Blic.rs
